E CANTO PUR'IO

‘O sole s’annasconne ‘o mare pare ca dorme , ll’aria doce se fa viente e culla cu na canzone Ce sta na terrazza a Surriento ca s’affaccia ancora E chella musica sona sona e nun se po’ fermà Nu glicine profuma ‘e viche fa ‘a gara cu ‘e limune nu fuoco brucia ‘int’ e vene e canta na voce dint’o core A ‘ primmavera è arrivata E canto pur’io p’’a felicità

STA VOCE É A TOJA

Comm’ è ddoce sta voce ca me parla
Comm’ ‘a na canzone me gira int’ ‘o core
Na musica ca chiane m’accumpagna
Mentre passane e gghiurnate e pure ll'ore

Pure vierne ormai è quase fernute
‘o sole scarfa ll’aria e le serate
a luna n’cielo pare assai cchiu bella
e ll’uocchie tuoje pareno ddoje stelle

'A CIORTA

Int’ ‘a vita ce vò a ciorta 
Pure a fa’ ‘a puttana 
O ddiceva mia nonna 
Che era una ca pregava 
Ce vo’ ‘a ciorta pure pè gghì ‘a rubbà 
Senza manc’ ‘o mariuolo se po’ ffà
Ce vo nu mazz’ esaggerato
Pè purtà annanz’ ogni gghiurnata
‘ a voglia a correre pè tirà ‘a carretta
avvote nun te ne va una reritta
Ma i tengh’ nu segreto
Na risata nu cuorn' e na grattata
E vaffanculo pur’ ‘a mala iurnata

TIENE O' MARE DINT''O CORE

Tiene 'o mare dint’'o core E 'o cielo dinto a ll’uocchie Ma è tempesta chella ca me daje Onne ca sbattene ncoppa 'a riva E viente ca scioscia senza fine Tiene 'o mare dint’'o core E 'o cielo dinto a ll’uocchie Ma è l’ammore ca me dai Sole ca bruscia sotto a’ pelle E luna ca accarezza ll’anema Tiene 'o mare dint''o core E 'o cielo dinto a ll’uocchie Ma ogni parola è comme na canzone E vita nasce sempre, a tutte ll'ore

VULESSE PUTE' DDICERE

E' tiempo d'ammore e sona na canzone Fernesce n'ata vota sta stagione e fore chiove , chiove. Fredda è ll'aria e 'o sole s'annasconne Nu mese è passato e tu pè semp' te ne si' gghiuto 'A casa toja nun è cchiù 'a stessa , manca 'a presenza , manca 'a voce manca 'o core che l'ha sempe mantenuta. E' tiempo d'ammore è tiempo 'e carezze staie dint''e penziere e accussì te voglio arricurdà, miez'a terra e a' vigna ca putave e tu cuntento pare ca vulave. Te vulesse sta ancora vicino ca mano dint'a' toja a me scarfà. Vulesse putè ddicere cu nu sorriso ... papà !!! e guardarte mentre 'a faccia toia.. s'avota...pe me putè salutà...

'O VIENTO

'O viento me sfruculea 'e pensiere scutulea 'e mpicce comme a' fronne secche, Sisca , sfrunzulea , s'arravoglia attuorno a'' fronte Fa friddo fa càvero, 'o sole s'annasconne e po' torna Vi' che ghiurnate se so appriparate Intanto 'a musica m'accumpagna Battisti canta na canzone e m'arricorda parole d'ammore, 'a strada s'allonga , s'accorcia , na curva e po' s'adderizza, 'a vita è comm''a st'autostrada... ogni tanto me faccio na fermata !

E VIECCH' E NA VOTE

Diceva nu ditto antico... "Quanne iesce 'a carrozza senza cavallo, fernesce 'o munno"'... 'E viecchie 'e na vota sapeveno guardà luntano E mo ca carrozza è asciuta... e pure o' munno è fernuto. 'A ggente s'accide pe niente e pe niente corre, corre, So 'e sorde a ccummannà 'e jurnate e nun ce sta surriso che te sape accumpagnà. Nun canuscimmo 'o vicino 'e casa e ce scurdammo 'o bbene ch'avimme avuto, se dicene 'e bbuscie, se nganna 'o core e nun se crede cchiù, manco all'ammore. 'E mmane ca na vota servevano p''a terra mo sanno sulo arrubbà... nun sanno cchiu accarezzà... Nu munno ca nun tene rispetto p''e viecchie e p''e criature, nun tene dimane !

BASTA CA TU ME GUARDE

E' pprimmavera ma tarda 'o sole, comme a' na parola ca nun se po' sentì. Scuro 'o cielo s'appripara e 'o viento nun acala... Chiove ancora ncoppa 'a sta terra nfosa e chiagnene 'e rrose 'e stu ciardino, sta staggione 'e turnà nun tene vuluntà! Ogni juorno all'aria matutina 'o core canta na canzone nun te 'o volesse dicere... ma m'hè fatto annammurà! Chiove ancora e 'o sole nun se vede, sulagna na rondine s'appripara 'o nivo, nuvole pesante fanno scuro 'o cielo Nu core nnammurato buscie nun sape dicere ... è a te ca voglio bbene e tutte hanna sapè e lassa ca chiove, ca scioscia e tira 'o viento, basta ca tu me guarde e i' me sento 'e scarfà....

PASSANE E TORNENO 'E STAGGIONE

Scenne 'a luna e se cocca ncoppa a ll'acqua,
culora ll’onne d’argiento  
mentre scoscia o’ viento,
nu mandulino antico sona na canzone... 
E' quase primmavera …
è turnata ancora ...

Passata 'a nuttata 'o cielo se culora,
se sentono 'e profume 'e sta matinata.
Chiano se scioglie 'a neve ncoppa 'a muntagna,
addeventa nu sciummo e canta …
mentre allero, doce scenne.. 

Na rondine sulagna se ferma mmiezo 'e ffrasche:
E' 'o primmo sole doce me scarfa 'a faccia,
passano e tornane tutte 'e staggione ...
e comm''e sempe nasce na viola
e n'ata vota è resurrezione....

NA VRENZOLA 'E SOLE

Na vrénzola 'e sole p''a fenesta

se cocca ncoppa a' nu commò

e pazzea dint'' a nu specchio....

E' acccuminciata n'ata jurnata ...

'O mare chino ancora d'argiento d''a luna 

accummencia a cantà 

ca nun ce sta nisciuno

Nu piscatore s' appripara 'e llenze,  

siscanno nu mutivo alléro, 

Coce 'o cafè dinto a' sta tazza, 

tene o sapore d''e vase, 

'o sapore 'e ll' ammore....

DDOCE E' A MUSICA D'O CORE

Accarezzame , abbracciame, astrigneme, fa ca stu calore me porta na jurnata 'e sole st'anema vo truva nu poco 'e pace into 'e braccia toje se vo' arrepusà.

Guarda st' uocchje ca se so' conzumate e llacreme nun ne vonno cchiù caccià amare so e' vase ca nun tornene amare so ll'ore ormaje passate

ddoce è a musica d'o core ca nun fernesce maje e s'annammurà

L'UOCCHIE TUOJE CANTAVANO LL'AMMORE

E' fernuta n'ata nuttata,
o'sole chianu chianu m'ha scetata,
famme durmì ancora, famme sunnà
so mumente ca me voglie arricurdà.

L'uocchie tuoie parlavano d'ammore
comme a' na nonna nonna cantavano pe' mme,
e sott'e stelle d''o cielo cchiù lucente ,
nuje c'astrigneveme senza penza' a niente.

Addò staje core ca m'hè 'ncatenata,
vulesse nun fa passà maje sta nuttata,
vieneme nzuonno, damme chilli 'vase,
ca nun m hè dato 'o tiempo d''e cuntà.

Portame ancora ncielo cu na canzone,
guardame ancora ccu l'uocchie 'e ll'ammore,
mentre a' luce d''o sole 'e stu juorno ngrato
trase pe sta fenesta comm''a nu core scunsulato.

E CHIOVE...

Perse so' tutt''e pparole,

comm'è fredda sta jurnata senza 'o sole,
Annanze a' nu semaforo nu marrucchino
mentre na criatura tutta sporca,
cu ll'uocchie spalancate,
aspetta quacchè spiccio pe guadagnà 'a serata...
Na vicchiarella assettata nterra
cerca 'a carità senza guardà...
Sotto a ll'acqua ca scenne comme a' nu turrente,
'a gente fuje senza vedè niente...
E chiove...chiove...chiove...
fa friddo e s'è gelato pure 'o core...

N'ATA VOTA VIERNO

'O juorno s'affaccia comme a na vecchia arret''a' na fenesta
chianu chiano guarda 'a via e po s'annasconne areto 'e nnuvole,
e comme si fossero na tendina primma 'e scosta e po' l'accosta.
Nun ce sta' n'anema p''o vecariello tutto nfuso,
sulo na jatta s'arrampeca ncoppa a na pianta 'e fiche,
'o viento scioscia, s'arravoglia attuorno 'e mmura,
sona nu mutivo ca nun capisce cchiu' nisciuno...
Luntano, comme a' nu suonno
se sente doce, doce 'o lamiento d''e zzampogne....

DAMME STI' MMANE

DAMME STI MMANE

Damme sti' mmane,
fanne nu cuoppo,
miettece a dinto
'e piezze 'e stu core,
ca s'è tutto rutto..
Cu 'e llacreme 'e chist'uocchie
ca oramaje so' asciutte
lavale chiano e stiennele 'o sole.
Sul'isso c''o calore cchiù forte
ne po' caccià st'addore 'e morte...
Pigliale a' uno a uno,
vasale doce doce,
dacce l'ammore
e cantace na canzona...
Na nonna nonna,
comme a nu sciuscio 'e viento
ca mentre sona
azzecca tutt''e piezze...
Cu 'a luce d''e stelle,
comme a nu filo argiento,
arricammace 'o sentimento
ca porta sino a
ncielo...
Ma nun perdere tiempo,
'o juorno è quase fernuto,
tiene luntano 'a notte...
me basta nu mumento...

FAMME VEDE' O SOLE

Tu puorteme a vedè o sole

famme sentì  ca  pure si chiove

a musica d’o core nun se ferma manc pè n’ora.

Cantame  chelle nnot ‘antiche

ca nzieme e stell ‘ ro ciel sanne fa luce

int’e viche cchiù scure.

Famme sentì chella voce ruffiana

che chiane chiane saglie

 e se  posa comm’ a   nu vase

mentre dice  busciarda

i  te vogli' ancora.

COMME FA O' CORE

Ma tu o ssaje comme fa o’ core

quann tutt’'e matine se sceta e nun te trova

se gira s'arrevota s’astregne e se cunzola
arricurdannese 'o tiempo ca nu steve sulo.



Tutte 'e juorne s’aiza c''a speranza

guarda 'o cielo speranno ca nun chiove

e si pure quacche vvota scenneno lacreme amare
se sonna l’arcobaleno e aspett''o sole.

I TE VURRIA VASA'

• • I te vurria vasà,
    
    So 'e note 'e na canzona
    
    Ca me fa arricurda'
    na sera ormaie luntana.
    
    
    
    Nu vaso accussi doce
    
    Nun se po’ cchiù scurda'
    
    'O ricordo ancora coce
    
    

    E nu me vo' lassà
    
    
    
    E stasera canto pur' io
    
    nzieme a sti nnote antiche
    
    e 'a voce saglie chiano,
    se perde int’a sti viche
    
    
    
    pure 'a luna sola sola
    
    se ferma pe sentì
    
    e tutte stelle ncielo
    se ncantano a guardà
    
    
    
    Comm’è doce sta serata
    
    pure 'o viento è calato
    
    sa vò godè pur’isso
    sta strana serenata
    
    
    
    E i' guardo 'o cielo e canto
    
    e canto e m’arricordo
    
    l’uocchie tuoi belle
    ca nun pozzo scurdà...
    
    
    
    Comm''a me guaradave
    
    tu parlave e io me perdevo
    
    Nu vaso comme na carezza
    
    Na promessa zittu zittu...
    ......
    
    addà venì 'o tiempo....
    
    
    
    
    uno splendido brano di Nino D'angelo  interpretato da Monica Sarnelli 
    
    
    
    

AMMORE

E' na catena ca nun tene pace 

sta voglia 'e te cerca ca m'arrevota

Tutt' e notte ritorna 

è na canzone 

ca gira inta e cervella 

senza posa ...

Io nun saccio chi si 

comme te chiamme

che faccia tiene

come parle...

Sento sulo dint'o core 

che canta 

e pò... 

me chiamma ammore!